Home » Avviżi (Page 3)
Category Archives: Avviżi
Programm ta’ Attivitajiet għal żmien ir-Randan u l-Ġimgħa l-Kbira
14 ta’ Marzu 2020 – Mysterium Fidei
Serata ta’ mużika sagra u letterarja mis-Soc. Fil. Naz La Valette flimkien mar-Rev. Arċipriet u l-Kapitlu tal-Kolleġġjata ta’ San Pawl Nawfragu, bis-sehem tal-La Valette Ensemble taħt id-direzzjoni ta’ Maestro James Chappell, bis-sehem tas-Sopran Rosabelle Bianchi u s-Solista Giorgio Fenech u b’riflessjonijiet tas-Sur Hector Bruno. Din is-serata ser issir fil-Knisja Kolleġġjata ta’ San Pawl Nawfragu, il-Belt Valletta, fis-7.30pm. Id-dħul huwa b’xejn.
23 ta’ Marzu sal-25 ta’ Marzu 2020 – Eżerċizzi Spiritwali
Eżerċizzi Spiritwali fis-sede tas-Soc. Fil. Naz. La Valette, fis-7.15pm. Il-Predikatur ser ikun id-direttur spiritwali tas-Soċjetà, Patri Victor Paul Farrugia O.Carm.
30 ta’ Marzu 2020 – Ikla bejn il-ħbieb
It-Tnejn 30 ta’ Marzu ser issir ikla fis-sede tas-Soc. Fil. Naz. La Valette.
4 ta’ April 2020 – Marċi Funebri mis-Soċ. Muż. Sant’ Elena ta’ Birkirkara
Is-Soċ. Muż. Sant’ Elena ta’ Birkirkara ser ittella’ programm ta’ marċi funebri fis-sede tas-Soc. Fil. Naz. La Valette, mill-11.00 am sas-1.00pm.
4 ta’ April 2020 – In Cruce Vita
Is-Soc. Fil. Naz. La Valette ser ittella’ kunċert ta’ mużika sagra u funebri mill-pinna ta’ Mro. Vincenzo Ciappara, Mro. Ray Sciberras, Mro. Joseph Sammut, Mro. Cardenio Botti u Mro. Dominic Darmanin, bis-sehem ta’ baned lokali flimkien mas-Soc. Fil. Naz. La Valette, taħt id-direzzjoni ta’ Mro. Dominic Darmanin. Mistiedna speċjali f’dan il-kunċert ser ikunu Mro. Ray Sciberras u s-Sopran Rosabelle Bianchi. Dan il-kunċert ser isir fi Pjazza Teatru Rjal, il-Belt Valletta fit-8.00pm. Biljetti jistgħu jinkisbu mis-Sede tas-soċjetà.
6 ta’ April 2020 – Riċeviment fis-Sede tas-Soċjetà
Riċeviment ta’ ringrazzjament lil dawk il-baned li ħadu sehem fil-kunċert ‘In Cruce Vita’. Waqt din is-serata l- Banda Sant’ Antnin ta’ Birkirkara ser tkun qed teżegwixxi numru ta’ marċi funebri. Dawk il-membri li jixtiequ jattendu għal dan ir-riċeviment, jistgħu jiksbu l-biljett mingħand l-iskrivan għall-prezz ta’ €5.
8 ta’ April 2020 – Kunċert tradizzjonali ta’ marċi funebri
Ser isir il-kunċert tradizzjonali ta’ marċi funebri fis-sede tas- Soc. Fil. Naz. La Valette, mill-Banda La Valette taħt id-direzzjoni tas-Surmast Dominic Darmanin. Dan il-kunċert jibda fit-8.00pm.
Mit-28 ta’ Marzu sal-10 ta’ April – Wirja bit-tema ‘Via Veritas Vita’
Ser issir wirja ta’ arti sagra fis-sede tas- Soc. Fil. Naz. La Valette. Ħinijiet tal-ftuħ mid-9.00am sa 12.00pm u mill-4.00pm sat-8.30pm. Nhar Ħamis ix-Xirka, il-wirja tibqa’ miftuħa sal-10.00pm.
10 ta’ April 2020 – Seba’ visti fl-okkażjoni tal-Ġimgħa l-Kbira
Ser isiru seba’ visti lil Ġesù Sagramentat fil-knejjes tal-Belt. Imexxi dawn il-visti, id-direttur spiritwali Fr Victor Paul Farrugia O. Carm. Dawn il-visti jibdew fl-10.30am mis-sede tas- Soc. Fil. Naz. La Valette.
10 ta’ April 2020 – Marċi funebri mis-Soċ. Fil. San Pietru Banda Birżebbuġa
Il-Banda Birzebbuġa ser iddoqq set ta’ marċi funebri fis-sede tas-Soc. Fil. Naz. La Valette, mill-11.00am ’il quddiem.
10 ta’ April 2020 – Servizz tal-Banda fil-Ġimgħa l-Kbira tal-Belt
Kif tradizzjonalment isir, il-Banda tas-Soc. Fil. Na. La Valette ser tkun qed tagħti servizz ta’ marċi funebri bil-pass uniku tagħha quddiem il-Vara l-Kbira, fil-purċissjoni tal-Ġimgħa l-Kbira li toħroġ mill-Knisja ta’ Santa Marija ta’ Ġesù (Ta’ Ġieżu). Din il-purċissjoni tibda fis-6.00pm.
Fl-okkażjoni tal-Ġimgħa l-Kbira, il-Banda La Valette ser tkun qed iżżanżan uniformi ġdida.
Preżentazzjoni ta’ bukkett fjuri lil San Ġużepp
Il-President tas-Società Jonathan Grima ppreżenta bukkett fjuri lill-istatwa ta’ San Ġużepp nhar il-Ħadd li għadda waqt il-purċissjoni fil-ftuħ tas-Sena Ġużeppina.
Ċelebrazzjoni tal-bidu tal-ħidma pastorali tal-Arċipriet il-ġdid, il-Kan. David Cilia
Il-Banda tas-Società La Valette ser takkumpanja b’marċi l-korteo li ser iwassal lill-Arċipriet il-Ġdid, tal-Kolleġġjata Insinji ta’ San Pawl Nawfragu, il-Belt Valletta, il-Kanonku David Cilia, nhar is-Sibt 18 ta’ Jannar, propju f’Jum il-Pussess tal-istess Arċipriet.
Dan il-korteo jibda mill-Bażilika tal-Madonna tal-Karmnu, il-Belt Valletta fil-4.45pm. Inħeġġukom tattendu sabiex nagħtu merħba xierqa lill-Arċipriet il-ġdid.
Ad Multos Annos Arċipriet
Programm ta’ attivitajiet u ċelebrazzjonijiet mis-Soc. Fil. Naz La Valette, fl-okkażjoni tal-Festa ta’ San Pawl, fil-Belt Valletta
Il-Ġimgħa 31 ta’ Jannar 2020 – Kunċert Ġenerali
8.00pm Kunċert Ġenerali ta’ marċi fis-sede tas-Società.
Is-Sibt l-1 ta’ Frar 2020 – Servizz tal-Banda waqt il-festa tat-tfal
10.00am Marċ mill-Banda tas-Soċjetà La Valette minn quddiem il-Kolleġġjata Insinji u Arċipretali ta’ San Pawl Nawfragu fi Triq San Pawl fost briju tat-tfal preżenti. F’każ ta’ maltemp din l-attività tiġi posposta għat-8 ta’ Frar.
Il-Ħadd 2 ta’ Frar 2020 – Riċeviment tal-Festa u ftuħ tas-sena mużikali
7.00pm Riċeviment tal-festa fis-sede tas-Società. Waqt dan l-avveniment ser ikollna wkoll magħna l-banda tas-Soċjetà Mużikali Madonna tal-Karmnu tal-Balluta.
Il-Ħamis 6 ta’ Frar 2020 – Brass Band
8.30pm Kunċert ta’ Brass Band b‘kollaborazzjoni mal-Għaqda tal-Pawlini fis-sede tas-Società. Din l-attività tinkludi mużika leġġera u briju mill-partitarji u segwaċi tal-Banda tagħna u s-sorpriżi ma jonqsux.
Is-Sibt 8 ta’ Frar 2020 – Marċi Brijużi fis-sede tas-Società u Ikla tal-festa bejn il-Pawlini
11.00am Piccola Banda magħmula minn mużiċisti tal-Banda tagħna fis-sede tas-Società, sabiex tferraħ lil dawk preżenti b’marċi brijjużi. Wara ser tiġi organizzata ikla bejn il-Pawlini fl-istess sede tas-Società
Il-Ħadd 9 ta’ Frar 2020 (Filgħodu) – Lejlet il-Festa – Banda Mistiedna
11.00am Il-Banda tas-Soċjetà Filarmonika Sliema se tferraħ lil dawk preżenti b’marċi brijjużi fis-sede tas-Società.
Il-Ħadd 9 ta’ Frar 2020 (Filgħaxija) – Il-Marċ tradizzjonali ta’ Lejlet il-Festa
6.45pm Il-Banda tas-Società, ser tibda marċ minn quddiem is-sede tal-istess Società. Hekk kif il-banda tas-Società tasal fi Triq San Pawl ser tingħaqad magħha l-Banda Beland taż-Żejtun u jitkompla l-marċ sa ħdejn il-Qampiena fi Triq il-Mediterran.
It-Tnejn 10 ta’ Frar 2020 – Jum Il-Festa – Il-Marċ tradizzjonali tas-Siegħa
1.00pm Il-banda tas-Società ser tesegwixxi repertorju ta’ marċi brijużi waqt il-Marċ tradizzjonali u tant mistenni ‘Tas-Siegħa’ fost briju tal-partitarji. Il-marċ jilħaq il-qofol tiegħu għall-ħabta tat-3.00pm hekk kif jasal fil-bidu ta’ Triq San Pawl.
Attivitajiet tal-Milied
21 ta’ Diċembru 2019 – Finali tal-Kompetizzjoni Presidents Cup tal-Isnooker.
Il-Finali tal-Presidents Cup ser tibda fid-9.00am, u fil-11.00am issir riċeviment li fih ikun hemm il-preżentazzjoni tat-trofew lir-rebbieħ. Biljetti għal dan ir-riċeviment jistgħu jinkisbu mingħand il-markaturi sad-19 ta’ Diċembru. Fil-11.15am fis-sede tas-Soċjetà ser ikollna 6 piece brass band tallegra b’mużika tal-Milied lin-nies preżenti.
22 ta’ Diċembru 2019 – Rigal li Jibqa’
Din is-sena is-Soċjetà ddeċidiet li tagħmel attività diversa mis-soltu. Żmien il-Milied huwa żmien ta’ ferħ, iżda mhux għal kulħadd. Differenti minn tfal oħra, tfal li jgħixu fi stitut isibu żmien il-Milied bħala żmien diffiċli u li possibilment fih iħossu aktar is-solitudni. Għaldaqstant din is-sena ġie deċiż li ser issir żjara f’istitut tat-tfal u waqt li nqattgħu ftit ħin ma’ dawn it-tfal ser jiġu preżentati wkoll xi rigali.
28 ta’ Diċembru 2019 – Brass Band fis-Sede tas-Soċjetaà u Christmas Buffet Dinner fil-MonteKristo Estate
Nhar is-Sibt 28 ta’ Diċembru fl-10.30am fis-sede tas-Soċjetà ser ikollna brass band tallegrana, b’mużika diversa fosthom marċi. Fis-7.30pm imbaghad ser isir Christmas Buffet Dinner b’2 siegħat open bar (jinkludi birra, inbid, soft drinks u ilma) f’MonteKristo Estate għal prezz ta €26. Booking jista’ jsir billi tkellmu lil xi membru tal-kumitat jew billi tkellmu lill-markaturi.
31 ta’ Diċembru 2019 – Nineteen 2 Twenty Celebration
Lejlet is-sena il-ġdida fis-sede tas-soċjetà ser ikollna brass band mill-10.30pm ‘l quddiem u flimkien niċċelebraw il-bidu ta’ sena ġdida flimkien.
4 ta’ Jannar 2020 – Rigal tal-Ħajja
Il-Milied vera li jkun għadda, però qatt mhu tard wisq biex tagħti rigal, speċjalment ir-rigal tal-ħajja. Le dan mhux ser jiswilek flus imma jiswa daqs l-ifjen deheb. Nhar is-Sibt 4 ta’ Jannar 2019 sejrin nagħtu d-demm bħala soċjetà. Għaldaqstant jekk int tixtieq tikkontribwixxi f’dan ir-rigal tista’ tinkiteb għal din l-attività billi tkellem lil xi membru tal-kumitat jew billi tinkitbu għand il-markaturi.
Il-festa ta’ Santa Ċeċilja
Illum, 22 ta’ Novembru, niċċelebraw il-festa ta’ Santa Ċeċilja, Martri, patruna tal-Mużiċisti. Fis-sede tas-Soċjetà tagħna wieħed jista’ jsib pittura mill-isbaħ ta’ din il-qaddisa.
Imma min kienet Santa Ċeċilja?
Santa Ċeċilja, li għexet fit-tieni seklu wara Kristu, hija waħda mill-aktar martri magħrufa, tant li barra Marija Omm Ġesù, hija waħda mis-7 qaddisin nisa li jissemmew fil-Litanija tal-Qaddisin. Santa Ċeċilja kienet imwielda f’familja nobbli u kienet miżżewġa lil Valerjanu. Valerjanu u ħuh kienu kkonvertew għall-Kristjaneżmu permezz ta’ Ċeċilja. Kienet magħrufa ħafna għall-imħabba li kellha lejn il-mużika u kif permezz tal-mużika kienet tfaħħar lil Alla. Frott it-twemmin Kristjan, Ċeċilja, Valerjanu u ħuh ingħataw il-martirju fuq ordni tal-prefett Turcius Almachius. Hija kienet midfuna fil-Katakombi ta’ San Kallistu, iżda wara is-sarkofagu tagħha ġie ripożizzjonat ġol-Knisja dedikata lill-istess Santa Ċeċilja fi Trastevere.
Ta’ min isemmi wkoll li meta fetħu l-qabar tagħha fl-1599, il-ġisem tagħha kien għadu intatt.
