Messaġġ mill-President is-Sur Jonathan Paul Grima
Nilqgħak fis-sit elettroniku uffiċjali tas-Società Filarmonica Nazionale La Valette, Società bi storja kbira u b’suċċessi kbar f’Malta u lil hinn minn xtutna.
L-għan prinċipali ta’ din is-Società minn dejjem kien li tiġi ffurmata Banda biex tagħti kontribut dirett fil-Festa f’ġieħ in-Nawfraġju tal-Appostlu Missierna San Pawl, kif ukoll li trawwem żgħażagħ fit-tagħlim tal-mużika mingħajr l-ebda ħlas biex il-Banda tas-Società tkompli tikber u tiġġedded.
Dan l-aħħar bħala Società ħdimna bis-sħiħ sabiex, apparti li nġeddu, insebbħu u nħarsu dak li għandna, naraw ukoll kif nistgħu nwasslu u nkabbru aktar l-isem tas-Società tagħna, issa li qed inħarsu ‘l quddiem lejn l-anniversarju tal-150 sena mit-twaqqif tal-banda tagħna. Kien għahlekk li ħdimna sabiex nagħtu l-ħajja il-profil tagħna ta’ Facebook u Youtube, ħloqna wkoll paġna fuq Spotify sabiex dak li jkun jista’ jisma’ diversi marċi, iżda wkoll ħloqna website ġdida, b’ħafna informazzjoni, storja, avviżi mis-Società, kif ukoll post sabiex intom tkunu tistgħu tikkuntatjawna u tagħtuna l-ideat tagħkom. Barra dan grazzi wkoll għal Radio City 98FM, li qiegħed ixandar 24 siegħa kuljum mis-sede tas-Società tagħna, minn din il-website tistgħu wkoll issegwu l-istazzjon tar-Radju, b’varjetà kbira ta’ programmi li diversi minnhom huma mtella’ mill-membri tas-Società tagħna.
Viva l-Banda tagħna
Siam de la Valette
Jonathan Paul Grima
President