Is-Surmast Joseph Sammut twieled il-Belt Valletta fl-1926 u ġej minn familja ta’ mużiċisti. Nannuh kien idoqq il-kuntrabaxx u missieru kien vjolinċellist magħruf. Huwa studja t-teorija u l-istrument taħt missieru Vincent u l-armonija taħt is-Surmast Carmelo Pace. Ta’ sbatax il-sena kien diġà solist fl-Orkestra tal-Ammirall tan-Navy Ingliża u ta’ 26 sena laħaq Surmast Direttur tal-istess orkestra. Fl-1952 huwa mar l-Ingilterra fuq scholarship tal-British Council fejn kompla l-istudji tiegħu għad-direzzjoni, taħt id-Diretturi tal-Orkestra Dr Clarence Raybould u Sir Malcolm Sargent. Lura Malta huwa kellu l-inkarigu li jifforma l-orkestra tal-British Council. Fl-1956 huwa reġa’ ngħata scholarship ieħor għal studju tal-Mużika Kontemporanja, taħt Dr Clarence Raybould.
Meta l-orkestra tal-Ammirall waqfet topera, Joseph Sammut inħatar Surmast Direttur tal-Orkestra tat-Teatru Manoel fl-1968. Huwa kien ukoll Surmast Direttur tas-Soċjetà Filarmonika Leone ta’ Għawdex u Direttur tal-Chorus Melitensis. Idderieġa l-Chorus Melitensis f’festivals f’Wales u fl-Italja. Sammut kiteb diversi kompożizzjonijiet varji fosthom ħames oratorji. Mexxa l-Banda La Valette għal 37 sena bejn is-sena 1970 u l-2007.
L-aħħar darba li s-Surmast Sammut idderieġa l-Banda tas-Società kien fil-Kunċert La Sollevazione di Cristo li sar fl-Istitut Kattoliku f’Apil tal-2019. Huwa dderieġa l-marċ miktub minnu, Al mio caro amico Giuseppe.
Huwa miet fl-10 ta’ April tal-2024 fl-età ta’ 97 sena.