Home » Aħbarijiet (Page 3)
Category Archives: Aħbarijiet
Pussess tal-Arċipriet il-ġdid
Nhar is-Sibt li għadda s-Società Filarmonca Nazionale La Valette ħadet sehem fil-pussess tal-Arċipriet il-ġdid tal-Kolleġġjata ta’ San Pawl Kan. David Cilia billi akkumpanjatu mill-Bażilika tal-Madonna tal-Karmnu sal-Kolleġġjata.
Quddiesa ta’ Ringrazzjament
Dalgħodu saret Quddiesa ta’ Ringrazzjament b’suffraġju għal ruħ il-membri mejtin f’għeluq il-Festi tal-145 anniversarju mill-Fondazzjoni fis-Santwarju Bażilika tal-Madonna tal-Karmnu.
Is-Surmast Dominic Darmanin
Mro. Dominic Darmanin twieled il-Belt Valletta f’Mejju tal-1962. Beda l-istudji mużikali tiegħu fl-età ta’ 9 snin fl-iskola tas-Sależjani St Patrick’s f’Tas-Sliema u fl-iskola tal-mużika Johann Strauss. Tgħallem it-trumbun taħt id-direzzjoni ta’ Mro. Anthony Zammit u aktar tard, taħt il-gwida ta’ Mro. Paul Borg fejn akkwista tliet diplomi: ALCM, LLCM u FLCM. Studja l-armonija u l-kuntrapunt għand il-mibki Mro. Carmelo Pace u għand il-Profs. Charles Zammit fejn iggradwa bid-diploma A.Mus.LCM.
Għallem f’diversi baned Maltin u Għawdxin sakemm fl-1993 inħatar Surmast Direttur tas-Soċjetà Filarmonika Pinto Banda San Sebastjan. Huwa waqqaf il-Pinto Brass Band kif ukoll inawgura l-ewwel sensiela ta’ Kunċerti Sinfoniċi. Ħadem għal seba’ snin bħala mużiċist mal-Orkestra tat-Teatru Manoel.
Kompożitur ta’ diversi marċi għall-banda kemm brijużi u kemm funebri. Kiteb ukoll sensiela ta’ xogħlijiet klassiċi għall-banda.
Fl-1 ta’ Jannar 2008 inħatar Surmast Direttur tas-Soċietà Filarmonika Nazionale La Valette wara li għamel 29 sena bħala mużiċist tal-banda La Valette.
Kaludi Kaludov u Anna Dytry jżuru postijiet ta’ interess storiku fil-Belt Valletta
Dalgħodu, it-Tenur Kaludi Kaludov u Soprana Anna Dytry, li huma l-mistednin speċjali għall-kunċert ta’ nhar is-Sibt Omaggio A Giuseppe Verdi, kellhom iċ-ċans sabiex iżuru, il-Kon-Katidral ta’ San Ġwann, il-Palazz tal-President u l-Armerija tal-istess Palazz. Kemm it-tenur kif ukoll is-soprana baqgħu impressjonati bil-ġmiel ta’ dawn il-postijiet, u wrew interess fl-istorja sabiħa tal-gżejjer tagħna.
Waqt din il-mawra kien hemm jakkumpanjaw lil dawn il-mistiedna speċjali, iċ-Chairperson tal-PBS Dr Tonio Portughese, kif ukoll id-Direttur tal-Bar u l-Assistant Direttur Ġenerali, is-Sur Michael Borg.
It-Tenur Kaludi Kaludov
Kaludi Kaludov huwa tenur internazzjonali Bulgaru li kanta f’diversi teatri tal-opra fosthom La Scala ta’ Milan, f’Genova, Pariġi, Buenos Aires, Chicago, Huston u Vjenna fost l-oħrajn.
Huwa wera l-kapaċità tiegħu meta s-Surmast Zubin Mehta stiednu bħala Radames f’kunċerti tal-Aida mal-Filarmonika ta’ Iżrael.
It-tenur ikkollabora ma’ diversi artisti internazzjonali fosthom Mirella Freni, Cheryl Studer, Placido Domingo, Piero Capuccili, Nicolai Ghiaurov, Renato Bruson u Sherill Milnes u taħt id-direzzjoni ta’ diversi surmastrijiet fosthom Claudio Abbado, Riccardo Muti u Fabio Luisi.
Is-Sopran Anna Dytry
Anna Dytry twieldet il-Polonja u tgħallmet taħt Kaludi stess fin-New Bulgarian University ta’ Sofia. Hija Solista fit-teatri ta’ Plovdiv u Stara Zagora fil-Bulgarija. Hija wkoll iggradwat mill-Iskola tal-Mużika Primarja u Sekondarja fil-klassi tal-vjolin u kant.
Hija taħdem ukoll mat-teatri f’Varna, Ruse u Burgas. Hija ħadet sehem f’diversi festivals internazzjonali fosthom fi Cieszyn f”Viva il canto”, f’Telemann, fil-Bansko Fest. Ħadet sehem f’diversi opri fil-Polonja, l-Awstrija, il-Ġermanja, ir-Repubblika Ċeka, ir-Rumanija, l-Italja, is-Solvakkja u l-Brażil.
Ir-repertorju tagħha jinkludi rwoli mill-opri ta’ Puccini: Tosca (Tosca), Mimi (La Boheme), Liu (Turandot), Cio-Cio-San (Madama Butterfly), Verdi: Elisabetta (DonCarlo), Leonora (Trubadur), Giulietta (Un Giorno di Regno), Bizet: Michaela (Carmen), Mozart: Countess (Le Nozze di Figaro), Donna Elvira (Don Giovanni), Offenbach: Giulietta (Tales of Hoffmann), Tchaikovsky: Tatiana (Eugeniusz Onin), Jolanta (Jolanta) u oħrajn.
Min kien Giuseppe Verdi
Kitba ta’ Joe Chetcuti
Giuseppe Verdi twieled fid-9 ta’ Ottubru 1813 fir-raħal ta’ Le Roncole fil-Provinċja ta’ Parma fl-Italja. Tajjeb ngħidu, la qed insemmu l-lokalità fejn twieled Verdi, li llum dan ir-raħal ċkejken ta’ Le Roncole jġib l-isem tal-istess kompożitur: “Roncole Verdi” – lokalità li Verdi nnifsu tant ħabb u għex fiha għal ħafna żmien minn ħajtu.
Verdi beda l-istudji mużikali tiegħu ta’ età żgħira wara li flimkien ma’ familtu ħalla r-raħal ta’ Le Roncole u marru jgħixu f’Bussetto. Hemm beda jistudja l-kompożizzjoni. Fl-1832, Verdi kien applika biex jidħol jistudja fil-konservatorju ta’ Milan, iżda ma kienx aċċettat minħabba li kien għadu żgħir. Minn hemm għażel li jkompli jistudja mal-kompożitur Vincenzo Lavigna.
Fl-1833 ġie magħżul biex ikun id-direttur mużikali tas-Soċjetà Filarmonika ta’ Bussetto. Barra dan ix-xogħol, huwa kompla għaddej bil-kompożizzjonijiet u fl-istess ħin serva wkoll bħala organista fl-istess belt. Tliet snin wara żżewweġ lil Margherita Barezzi. Fl-1838 huwa rritorna Milan fejn iffinalizza l-ewwel opra tiegħu ‘Oberto’ u sena wara bl-għajnuna tal-ħabib tiegħu Giulio Ricordi rnexxielu jtellgħu din l-opra fit-teatru La Scala. Wara din l-opra, li ġiet milqugħa tajjeb ħafna, huwa kiteb opra komika bl-isem ‘Un giorno di regno’. Din l-opra ma kisbitx is-suċċess li kisbet l-ewwel biċċa xogħol tiegħu. Wara l-mewt ta’ martu fis-sena 1840, fl-età ta’ 26 sena huwa għadda minn perjodu diffiċli immens. Iżda ftit taż-żmien wara huwa rnexxielu jikkomponi żewġ opri oħra kbar: Nabucco (1842) u I Lombardi (1843).
Fl-ewwel kompożizzjonijiet operistiċi tiegħu naraw lil Verdi juri simpatija lejn il-moviment tar-‘Risorgimento’ – il-moviment Taljan favur l-unifikazzjoni tal-Italja. Tajjeb ngħidu wkoll li Giuseppe Verdi kien serva għal żmien qasir bħala politiku. Il-“Va Pensiero” mill-opra “Nabucco” tal-1842 – waħda mill-ewwel opri tiegħu – hija xhieda ta’ dan. Fil-fatt fiha joħroġ l-ispirtu ta’ unità bħala nazzjon. Snin wara, kienu bosta dawk it-Taljani li xtaqu li l-“Va Pensiero” tibda titqies bħala l-innu nazzjonali Taljan.
Wara s-suċċess ta’ dawn iż-żewġ opri huwa ma ħarisx lura. Fil-fatt fit-tliet diċenji ta’ wara kompla jikseb aktar suċċess u fama bil-kompożizzjoni ta’ opri kbar oħra fosthom Rigoletto (1851); Il Trovatore (1853) u La Traviata (1853), Don Carlos (1867) u Aida (1871). L-ewwel tlieta huma meqjusa bħala l-aqwa tliet opri li kkompona.
Verdi ddomina x-xena operistika fl-Italja wara l-perjodu ta’ Bellini; Donizetti u Rossini. B’kollox huwa kiteb xejn inqas minn 30 Opra Lirika. Minbarra dawn l-opri huwa kkompona ħafna aktar xogħlijijet mużikali. Ma nistgħux ma nsemmux xogħol kbir ta’ dan il-kompożitur li huwa r-“Requiem” ad unur il-poeta ħabib tiegħu Alessandro Manzoni li miet fl-1873.
Riċerka illi saret mis-sit – Operabase.com , turi li l-opri ta’ Verdi huma l-aktar li ġew imtellgħa madwar id-dinja f’dawn l-aħħar ħames snin. Fil-fatt Verdi jinsab fil-quċċata segwit minn Mozart u Puccini. L-opra ‘La Traviata’ imbagħad, hija l-aktar opra li ġiet imtellgħa f’dawn l-aħħar ħames snin madwar id-dinja, qabel l-opri Magic Flute ta’ Mozart u La Boheme ta’ Puccini.